Aalisartut Piniartullu Ulluannut atatillugu naalakkersuisoq Peter Borg inuussutissarsiummik ingerlatsisunut qujassuteqarpoq. Peqatigitillugu ilisimatitsissutigaa aalisartut kattuffiisa qaleralinniarneq pillugu isumaqatigiissutaata tigussaasunik iliuusinngortinneqarnissaa sulissutigineqalereersoq.
Aalisartut piniartullu Kalaallit Nunaata aningaasaqarneranut, kulturianut najukkamilu ataatsimoornernut pingaaruteqarluinnarput. Tamanna aalisarnermut, piniarnermut, nunalerinermut imminullu pilersornermut naalakkersuisup Peter Borgip Aalisartut Piniartullu Ulluannut atatillugu ilassinninnermini erseqqissaatigaa.
Aalisartut piniartullu sulinerannut qujaffigai, suliffissaqartitsinermut, ileqqutoqqanut nunattalu imminut pilersornerata nukittorsarnissaanut periarfissanut tapersiinerat erseqqissaatigalugu.
– Suliasi Kalaallit Nunaata ineriartorneranut imminut pilersornittalu nukittorsarnissaanut periarfissatsinnut tunngaviup pingaarutilimmik ilagaat, Peter Borg ilassinninnermini oqarpoq.
Isumaqatigiissut tigussaasunik iliuusinngortinneqassaaq
Peter Borgip aamma aalisartut kattuffiisa suleqatigiinnerat erseqqissaatigaa. Suleqatigiinnerat qaleralinniarneq pillugu isumaqatigiissuteqarnermik kinguneqarpoq. Kattuffiit isumaqatigiissut Ilulissanut tikeraarnerani taassumunnga tunniuppaat.
Naalakkersuisoq naapertorlugu kattuffiit kissaataat inassuteqaataallu pimoorunneqarput. Isumaqatigiissutip imarisaanik tigussaasunik iliuusinngortitsiniarneq aallartereerpoq, inatsisinik suliaqarnermut kiisalu pisassiissutinik tamarmiusunik, TAC-mik, pisassiissutinillu aalajangersaanermut atatillugu.
Isumaqatigiissut kattuffiit oqaloqatigiinnikkut aalisartunut inuussutissarsiummullu tamarmut iluaqutaasunik ataatsimoorussamik aaqqiissutissarsisinnaanerannut pitsaasumik takussutissaasoq isumaqarpoq.
Isumaqatigiinngittoqaraluartoq oqaloqatigiinneq
Apeqqutini tamani isumaqatigiittoqarneq ajoraluartoq, Peter Borgip kattuffinnik ammasumik pilersitsiviusumillu oqaloqateqartarnerup attatiinnarnissaa pingaartippaa.
Soqutigisat isiginnittaatsillu assigiinnginnerat pissusissamisoortoq naalakkersuisoq oqarpoq. Suleqatigiinneq ataqqeqatigiinnerlu aalisarnermik nukittorsaanissamut inuussutissarsiummillu ingerlatsisunut pitsaasunik sinaakkutissiinissamut aqqutissaasut tikkuarpai.
Ilassinninnini naggaserlugu aalisartut piniartullu tamaasa ullorsiorneranni pilluaqquai, tunniusimanerannullu inuiaqatigiinnullu tapersiinerannut qujaffigalugit.
Tusarfik: Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik.



