2025-mut naatsorsuutinut oqaaseqaammini kommunip allaffissornera aningaasatigut aqunneqanngitsoq, IT-mut isumannaallisarneqarani “sanngiippallaarlunilu pisoqalisimasoq”, sipaarniarnissamut pilersaaruteqanngitsoq innuttaasullu sullinnissaanut inatsisitigut pisussaaffimmut sunniuteqartoq nassuiaatigaa.
Kukkunersiuisoq suliaminut apeqqusiivallaarani Kommune Kujalliup aningaasaqarnera ingerlalluanngitsoq takutippaa. Kommunip nammineq allaffisornera peqqutaavoq.
2025-mut naatsorsuutinut suliami saqqummiinermi, kommunalbestyrelsip pingasunngornermi suliarisaani, allaffissornermi suliaqartut allassimapput, kommunip aningaasaliiffigineqartunut pilersaarutai aamma ukiuni arlaqartuni siumoortumik aningaasartuutissanut missingersuusiorneri pillugit saqqummiisinnaanngitsoq, tamannalu inatsisitigut pisussaaffiugaluarluni naammassineqarsimanngitsoq.
“Piviusorsiorpalaartumik aningaasat ukiumut aallartittussamut isertitassat atortitassallu naatsorsuutaat naammassineqarsimasoq kommunip aningaasaqarnera tamakkiisumik takussallugu aamma aningaasaqarnermik aqutsisinnaaneq ingerlalluartoq pisariaqartinneqarpoq. “Pineqartut marluk tamarmik Kommune Kujallermi takuneqarsinnaanngillat”, allaffissornermiit allassimapput.
Naatsorsuutini 14,8 mio. koruuninik sinneqartooruteqartut takutinneqarpoq. Aammali ingerlatsinermi aningaasartuutit aningaasaliissutiginertut 36,8 mio. koruunit sinnerlugit atuivallaartoqarsimalluni. Allaffissorneq malillugu sinneqartoorutit ingerlatsineq pillugu oqariartuuteqanngillat, tassani aningaasartuutit kontimut kukkusumut allattorneqarsimammata. Kommunip karsianut aamma naatsorsuusiornermut malittarisassaa 2011-meersuuvoq, siornatigullu nutarterneqarnikuunani.
Allaffissornermi aamma allanneqarsimavoq, siornatigut sipaarniarnermut pilersaarusiap kommunimi inatsisitigut pituttortumik pisussaaffianik immikkoortitsilersimasoq, innuttaasunullu kiffartuussinissamut piumasaqaataasut pitsaassusaannut annikillisaataasimalluni. Soraarsitsiortornerit aammattaaq ima isumaqarput, kommunip iluminni nakkutilliinermik suliassatik, naatsorsueqqissaartarfimmit innersuussutigineqarsimasut, naammassisinnaanngikkai.
Naatsorsueqqissaartartutut suliffeqarfiup BDO-p nalilerpaa, kommunimi IT-mut isumannaallisaaneq naammaginartumik aqunneqartoq. Allaffissornermiilli tamanna isumaqanngilaq.
“Kommunimi IT-mut isumannaallisaaneq annertuumik sanngiillunilu pisoqalisimavoq”, allaffissornermit allaatigineqarsimavoq.
Allaffissornermiilli siunnersuutigineqarpoq, naatsorsuineq akuerineqassasoq, ersarissumilli aalajangiigallarnertaqartumik: Akuersineq ima kisimi isumaqassasoq, isertitat aningaasartuutillu oqimaaqatigiissumik ingerlasut, kommunalbestyrelsilu aningaasaqarnermut tunngasumik isummissanngitsoq.
