Naleqqap partiinut tamanut kajumissaaruteqarnikuuvoq naartunaveersaasersuisimaneq pillugu suliaq, nunat tamat akornanni eqqartuussivimmi inatsisitigut misilinneqarnissaa tapersersorneraat imaluunniit tapersersunnginneraat isummerfigeqqullugu. Maannamut partiit arlaannaalluunniit kajumissaarummut tamanut ammasumik akissuteqanngillat.
Maanna partiit Naalakkersuisumut naartunaveersaasersuisimaneq pillugu suliaq ataatsimiinnermut matoqqasumut qaaqquneqarsimapput.
Naleraq soorunami ataatsimiinnermi peqataassaaq paasissutissallu saqqummiunneqartut tusarnaassallugit. Kisianni politikkikkut isummernerput isertuutinngilarput, aamma matuni matoqqasuni ilusilersorneqarnissanngilaq.
Naleqqap isummernera erseqqippoq:
Naartunaveersaasersuisimaneq pillugu suliaq Inuit akornanni aaqqissuussamik innarliinerit pillugit apeqqutinik ima sakkortutigisunik imaqarpoq, allaat suliaq inatsisitigut misilinneqartariaqarluni. Politikerit, atorfillit imaluunniit nalunaarusiortut aalajangiisuusumik naliliisussaanngillat, suliaq inuiannik nungusaataasumik iliuuseqarsimanermik imaluunniit nunat tamalaat akornanni inatsisinik unioqqutitsinernik allanik ilumut tunngaveqarnersoq. Tamanna nunat tamalaat akornanni eqqartuussivissuani aalajangerneqartariaqarpoq.
“Isummernerput isertuunniassallugu pisariaqartinngilarput. Isummernerput tamanut ammasumik oqaatigaarput – aamma ataatsimiinneq sioqqullugu. Partiilluunniit allat allatut isumaqarpata, taava tamanna aamma innuttaasunut ammasumik oqaatigissariaqarpaat,” Naleqqap siulittaasua Pele Broberg oqarpoq.
Tusagassiortunut attaveqarfissaq Kiista Fencker, allattoqarfimmi pisortaq, Naleraq (+299) 48 75 97 · mail@naleraq.gl
Paasissutissanik isertuussassatut pineqartunik saqqummiussisoqassappat, ataatsimiinneq matoqqasoq pisariaqarsinnaavoq. Kisianni paasissutissat ataasiakkaat pillugit isertuussineq politikkikkut oqallinnerup tamarmiusup isertuunneqarnissaanut tunngavilersuutigineqarsinnaanngilaq.
Naartunaveersaasersuisimaneq pillugu suliaq pingaarnerpaamik arnanut inuusuttunullu eqqugaasunut, piviusunut, akisussaaffik aamma naapertuilluarnerup atuutilersinneqarnissaanut tunngavoq. Taamaammat partiit qanoq isumaqarnersut Naalakkersuisullu qanoq iliuuseqarniarnersut innuttassunut apuunnissaannik pisussaaffeqarput.
Naleraq naatsorsuutigaa Naalakkersuisut ataatsimiinnerup kingorna ingerlariaqqinnissaq pillugu tamanut ammasumik nassuiaateqassasut. Peqatigitillugu partiit kaammattorpagut tamanut ammasumik oqaatigissagaat suliaq nunat tamat eqqartuussivissuanut suliakkiunneqarnissaa tapersersornerlugu.
Arnat siulliullugit – piviusullu tamarmik saqqummiunneqarlik.
