Naalakkersuisut danskillu naalakkersuisa Kalaallit Nunaata Danmarkillu akornanni ineqarnermut suliassaqarfiit assigiinngitsut pillugit suleqatigiinneq qanereersoq annertusarlugulu nukittorsarusuppaat, nunatta innuttaasuinut iluaqutaasussamik.
Naalakkersuisut danskillu naalakkersuisui Nuummi ataatsimeeqatigeeqqammerput. Ataatsimiinnermi Naalakkersuisut Siulittaasuat Jens-Frederik Nielsen statsministerilu Mette Frederiksen peqataapput.
Ataatsimiinnermi illugiit suleqatigiissitaliamik pilersitsissallutik isumaqatigiipput, kalaallinik danskinillu peqataaffigineqartussamik. Suleqatigiissitaq illoqarfinni nunaqarfinnilu pisortat illuutaat attartortittakkat qanoq nutarsarneqarsinnaanersut politikkikkut aalajangiinissamut tunngavissamik suliaqassaaq.
Naalakkersuisut Siulittaasuata Jens-Frederik Nielsen-ip danskit naalakkersuisuilu ataatsimoorlutik ineqarnerup iluani unammilligassat annertuut ilaannut siunissami sivisuumik atasinnaasunik aaqqiissutissarsioqatigiinnissaminnut pingaarutilimmik alloriaqatigiinnertik iluaraa.
– Pitsaasumik peqqinnartumillu angerlarsimaffeqaraanni toqqissisimasumik aalajaatsumillu inuuneqarnissamut tunngavissaqartoqartarpoq. Illoqarfinni nunaqarfinnilu illuutigut nutarsarneqartariaqarput ineriartortinneqartariaqarlutillu. Suleqatigiinnissamut siunertaqarluta nalunaaruteqarnitsigut ineqarnermut suliassaqarfiup pitsaanerusumik ineriartortinneqarnissaanut politikkikkut aalajangiinissamut patajaatsumik tunngavissamik pilersitsivugut, taama oqarpoq Jens-Frederik Nielsen.
– Kikkut tamarmik pitsaasumik inissaqartariaqarput. Nuannaarutigaara Kalaallit Nunaanni inuiaqatigiinnik ineriartortitseqataaffigisinnaagatsigu, pingaartumillu inuit angerlarsimaffiinik, danskit ministeriunerat Mette Frederiksen oqarpoq.
Kalaallit danskillu suleqatigiissitaata ineqarnermut suliassaqarfimmut aningaasaliinissamut pisariaqartitsineq ataatsimut nalilersussavaat, aaqqiissutissanillu assigiinngitsunik siunnersuuteqassallutik. Siunnersuutit Naalakkersuisut danskillu naalakkersuisuisa Kalaallit Nunaanni ineqarnermut suliassaqarfiup ineriartortinneqarneranut Danmarkip aningaasatigut qanoq peqataasinnaanera pillugu eqqartueqatigeeqqinnissaannut atorneqarsinnaapput.
Suleqatigiissitap ilaatigut ineqarnermut suliassaqarfiup qanoq aningaasalerneqarsinnaanera misissussavaa. Tassani aningaasaateqarfiit aqqutigalugit aningaasaliisoqarsinnaanera, kiisalu EU namminersortullu qanoq peqataatinneqarsinnaanersut aamma misissorneqassapput.
Aserfallatsaaliuinermi kinguaattoorutit 2,5 milliard kroniusut nalilerneqarput.
