Avannaata Kommuniani kommunalbestyrelsip Ilulissani fitnessertarfimmiinnissaq juunimi akeerutsingajallugu innuttaasunut ammaakkaluarpaa. Maanna aaliangiineq utertinneqassaaq: Inatsisitigut misissuinerup takutippaa, maleruagassat avaqqullugit aalajangiisoqarsimasoq, taamaasillunilu unammillernermut ajoqusiisoq. Suliaq kommunalbestyrelsip tallimanngorneq ulloq 28. aggustimi ataatsimiinnermi suliarineqarpoq.
Ilulissani fitnessertarfimmut ukiumoortumik isissutissaq ataasiarluni timersoriarnermi nalermik aamma sodavandimik pisinermik naleqarpoq. Tassa Avannaata Kommuniani kommunalbestyrelsip juunimi ataatsimiinnerminni innuttaasunut naatsorsuutigeqqusaa, kommunip fitnessertarfiutaannut isernissaq ukiumut 50 koruuninut appartinneqassasoq.
Siunnersuut borgmesterimeersuuvoq, tassani innuttaasut peqqinnarnerusumik inuuneqalernissaannut ajornanngitsumik akikitsumillu periarfissaqalerniassammata, taamaasillutillu Kalaallit Nunaat tamakkerlugu timersornerulernissamut siunertaasoq taperserneqarluni.
Maannakkulli politikerit tamanna pillugu sinnattuaqiinnartariaqarput. Taasereernerup kingorna illua-tungiliuttuniit inatsisitigut misissueqqissaarneq piumasarineqartoq, tassani maleruagassat avaqutiinnarlugit aaliangiineq naammassineqarsimasoq – kommunalbestyrelsilu taamaattumik suliaq utertissagaa innersuussutigineqarluni.
Kommunip namminersortut unammillersinnaanerat ajoquseqqusaanngilaa
Suliaq noqqaassutigineqareerluni inatsisitigut nalilersorneqarnissamut nassiunneqarpoq, inerniliinerlu Isumaginninnermut, Suliffeqarnermut, Ilaqutariinnut Nunamullu Namminermut Naalakkersuisoqarfimmut saqqummiunneqarpoq. Naalakkersuisoqarfiup ilitsersuutaa malinneqassasoq isumaqatigiissutigineqarpoq: Kommuni fitnessertarfimmik ingerlatsisinnaasoq, niuertarfinnulli unammillertiussanngitsoq.Nalilersuineq malillugu ajornartorsiut tassaavoq, ukiumoortumik 50 koruuneerneq unammilleqatigiinnermut innarliisussaasoq. Kalaallit Nunaata sineriaani fitnessertarfiit namminersortut arlaqarput, nalilerneqarporlu Ilulissani aamma taamatut ingerlasoqarsinnaasoq. Kommunimiilli akeqanngingajattumik neqerooruteqarnerup namminersortunik unammillerneqarsinnaanngilaq – akigititallu appasissut taamaasillutik aallartisaarusuttunik tunuartitsisussaannanngussalluni, oqaaseqartup oqaatigaa
