Annertuumik siallerluangaatsiarnerata qarsutsisoqarneratalu kingunerisaanik Qaanaap Mittarfiullu akornanni mittarfimmut aqqusineq angallavigineqarsinnaajunnaartoq Ineqarnermut, Attaveqaasersuutinut, Isorliunerusunut Upalungaarsimanermullu Naalakkersuisoqarfimmit maluginiarneqarpoq.
Naalakkersuisoqarfimmit ilisimatitsissutigineqarsinnaavoq, najukkami sanaartortuusoq suleqatigalugu ajoqusikkat piaartumik iluarsiniarlugit sulianik aallartitsisoqarmat.
Tamatumunnga atatillugu Air Greenlandimiit ilisimatitsissutigineqarpoq, illoqarfiup eqqaani mittarfiugallartussamik qulakkeeriniarluni, taamaalillunilu illoqarfiup aamma mittarfiup akornanni qulimiguulimmik angallavimmik pilersitsiniarluni sulissutigineqartoq.
Aamma Naalakkersuisoqarfimmit Avannaata Kommunia, kommunit aqqusiniutaannut eqqagassalerinermullu akisussaasoq oqaloqatigineqarpoq.
Naalakkersuisoqarfimmit pisut malinnaaffigineqarput.
